વિશ્વની બે આર્થિક મહાસત્તા અમેરિકા અને ચીન વચ્ચે ટ્રેડવોરને કારણે મંદીનું જોખમ ઊભું થયું છે ત્યારે સેફ હેવન તરીકે સોનાની ખરીદીમાં જોરદાર વધારો થયો હતો. ભારતમાં મંગળવાર, 23 એપ્રિલે સોનાના ભાવ પ્રતિ 10 ગ્રામ રૂ.1 લાખની મનોવૈજ્ઞાનિક અને ઐતિહાસિક સપાટીએ પહોંચ્યા હતા. સોનાની સાથે સાથે ચાંદીના ભાવમાં પણ જોરદાર તેજી જોવા મળી છે. ચાલુ કેલેન્ડર વર્ષમાં અત્યાર સુધીમાં દેશમાં સોનાના ભાવમાં આશરે 26.43 ટકાનો જંગી વધારો થયો છે. ડોલરના સંદર્ભમાં જોઇએ તો સોનામાં ચાલુ વર્ષે અત્યાર સુધી 31 ટકાનું ધરખમ વળતર મળ્યું છે.
31 ડિસેમ્બરે સોનાનો ભાવ રૂ.78,700 પ્રતિ 10 ગ્રામ હતો, જે 21 એપ્રિલે રૂ.99,500 થયો હતો. આ સમયગાળામાં ચાંદીમાં પણ 12.14 ટકા જેટલું ઊંચું વળતર મળ્યું છે. વૈશ્વિક બજારોમાં પણ સોનાના ભાવ પ્રતિઔશ આશરે 3,400 ડોલરની રેકોર્ડ સપાટીએ પહોંચ્યાં હતાં.

સોમવારે હાજર બજારમાં 3 ટકાના જીએસટી સાથે સોના રિટેલ ભાવ 10 ગ્રામ દીઠ રૂ.1 લાખને સ્પર્શ્યા હતા. એમસીએક્સમાં મંગવારે સોનાના જૂન વાયદાનો ભાવ રૂ.99,178ના અત્યાર સુધીનો સર્વોચ્ચ ભાવે ટ્રેડ થયો હતો.